Në 2 javë nafta u rrit me 6 lekë për litër, shoferët nuk i fikën makinat në shenjë proteste

Në orën 12:00 drejtuesit e automjeteve në Tiranë nuk e ndalën udhëtimin e planifikuar. Thirrjet për protestë për të kundërshtuar rritjen e çmimit të karburantit të shpërndara nëpër rrjetet sociale duket se nuk u dëgjuan.

“Të ulet çmimi në 150 lekë”, është kjo kërkesa e shkruar teksa në kryeqytet një litër naftë kushton deri në 22 lekë më shumë.

Nga një vëzhgim i kryer në disa nga pikat e tregtimit të karburanteve për 1 litër naftë duhet të paguash nga 169 deri në 172 lekë. Afërsisht, para dy javësh e njëjta sasi kushtonte 166 lekë.

Që kur vendi doli nga karantina, karburanti po iu kushton shumë drejtuesve të automjeteve në vend. Tregtarët argumentojnë rritjen e çmimit me shtrenjtimin e saj në tregjet ndërkombëtare.

Në qoftë se sot për një litër naftë paguan deri në 172 lekë për të njëjtën sasi, gjatë pandemisë së Covid-19, paguaje më pak se 150 lekë.