Misteri, kthesa e fortë në hetimet për zhdukjen e shqiptares në shtetin grek

Prej 19 tetorit të një viti më parë familja e adoleshentes shqiptare në Greqi Artemis Vassilis vijon të presë në agoni për shenja jete nga vajza e tyre. Kjo e fundit u largua nga shtëpia për të shkuar në një intervistë pune dhe që nga ajo kohë nuk është parë më.

Kërkimet e autoriteteve në Greqi nuk kanë sjellë asnjë rezultat, mirëpo rasti i shfrytëzimit për prostitucion të një vajze rumune nga një shqiptar, e cila u zbulua para pak ditësh ka risjellë në vëmendje edhe njëherë 19-vjeçaren shqiptare.

Gazeta e njohur greke “Ta Nea” shkroi sot në një artikull se rasti i vajzës rumune ka marrë përmasa të mëdha duke rihapur dosjet e çështjeve të tjera të ngjashme, siç është edhe ajo e zhdukjes së shqiptares.

“Rasti i rrëmbimit dhe shfrytëzimit për prostitucion të 17-vjeçares nga Rumania mund të fshehë diçka edhe më serioze, madje edhe një qark të organizuar që detyrojnë të miturit për prostitucion” tha një zyrtar i policisë greke.

Pas arrestimit të shqiptarit për shfrytëzim të rumunes, “tani po hapen dosjet e vajzave të fëmijëve të zhdukur, madje edhe ajo e Artemisit, gjurmët e së cilës ende nuk dihen që nga tetori i vitit 2020, megjithë hetimet intensive të policisë greke, por edhe familjes së saj” tha më tej zyrtari grek.