Hetuesit e SPAK e kapën me kok ainë në Tiranë, habit polici: E përdor për vete

Gjykata e posaçme la në burg efektivin e komisariatit nr.2 në Tiranë, Elefterios Sullaj, i cili u arrestua dy ditë më parë së bashku me Mikel Zhegun dhe Ersi Tafën. Të tre të arrestuarit janë nën akuzën e korrupsionit dhe trafikimit të lëndëve narkotike.

Gjatë kontrollit të ushtruar në makinën që drejtohej nga efektivi i policisë, u gjet një sasi kokaine, që dyshohet se do të trafikohej nga këta persona. Përballë gjykatës, Sullaj ka mohuar se ka qenë i përfshirë në trafikun e lëndës narkotike.

Ai ka thënë se është vetë përdorues i kokainës dhe se me Mikel Zhegun është shok. Sipas prokurorisë, hetimi ka nisur në vitin 2019 dhe ka rezultuar se gjatë komunikimeve telefonike, efektivi favorizonte në aktivitetin kriminal të shitjes së kokainës.

Mikel Zhegu sa herë ndalohej nga policia, komunikonte në telefon me Sullajn. Ky i fundit i thoshte që “jepu ndonjë kafe se atë duan ata dhe të lënë”. Ndërkohë në disa komunikime tjera, polici i kërkon Zhegut lëndë narkotike.

Përgjimet rrëzojnë pretendimin e Sullaj, i cili gjithësesi ka dhënë një deklaratë që do t’i jepte sërish një dënim, pasi punonjësit e policisë nuk mund të jenë kurrësesi përdorues droge.