Dy mijë euro ryshfet, gjykata lë në burg Prokurorin e Kukësit

Pokurori i Kukësit, Edmond Karriqi, i cili u arrestua pasi akuzohet si i përfshirë në korrupsion do të qëndrojë në burg me vendim gjykate.

Karriqi ka përfunduar në prangat e Policisë nën akuzën e korrupsionit tre dite me parë.

Ai u arrestua në qytetin e Kavajës ku ndodhej përkohësisht. Karriqi ka qenë në përgjim dhe vëzhgim dhe është filmuar duke marrë paratë në tavolinë nga vëllai i personi që kishte nën hetim për mbajtje droge. Shuma e parave që dyshohet rreth 2 mijë euro është marrë në Kavajë. Prokurorët e SPAK kanë dyshime se ka marrë dhe para të tjera nga ky person.

Dyshimet e para janë se prokurori është përfshirë në korrupsion dhe bashkë me të është arrestuar dhe shoferi i tij. Ndaj prokurorit është urdhëruar edhe kontroll banese.

Kariqi akuzohet për “Korrupsion pasiv i gjyqtarëve, prokurorëve dhe funksionarëve të tjerë të drejtësisë” të parashikuar nga neni 319/ç i Kodit Penal.