Arrestimi i kryebashkiakut të Lushnjes, Rama: S’do të ketë asnjë mbrojtje nga PS-ja 

Kryeministri Edi Rama ka deklaruar se kryebashkiaku i Lushnjes Fatos Tushe, që u arrestua paraditen e sotme me urdhër të SPAK, nuk do ketë asnjë mbrojtje nga ana e Partisë Socialiste. Rama tha se ashtu si çdo person tjetër i akuzuar nga drejtësia do duhet të përgjigjen vetë para drejtësisë me avokatët e tyre dhe gojën e tyre.

Ai shton më tej duke thënë se PS u shërben zgjedhësve dhe jo të zgjedhurve ndërsa thotë se çdo zgjedhës duhet ta dijë se besnikëria jonë ndaj tij nuk varet nga asnjë individ por është flamur beteje i PS.

“Kryetari i Bashkisë së Lushnjës dhe cilido tjetër i akuzuar nga drejtësia në këtë rast apo në çdo rast, nuk do të ketë asnjë mbrojtje nga Partia Socialiste e duhet të përgjigjen vetë para drejtësisë, me avokatët e tyre e me gojën e tyre! PS u shërben zgjedhësve jo të zgjedhurve.

Kryebashkiaku i Lushnjes Fatos Tushe është arrestuar me urdhër të Pokurorisë së Posaçme së bashku me 11 persona të tjerë vartës të tij dhe biznesmenë. Tushe  dyshohet se ka dhënë leje ndërtimi në kundërshtim me ligjin.