Vrau motrën në Shkodër, vëllai e mbajti viktimën tre ditë në banesë duke pirë birra pranë saj

Krimi i rëndë i regjistruar mbrëmjen e shkuar në qytetin e Shkodrës ka tronditur gjithë opinionin publik. Fabian Vuka, 55 vjeç ekzekutoi me armë zjarri, me silenciator, motrën e tij Diana Vukaj, 58 vjeç dhe prej tre ditësh e mbante kufomën në banesë. Mësohet se alarmin për zhdukjen e gruas e kanë dhënë fqinjët e saj tre ditë më parë dhe rrjedhimisht policia ka nisur kërkimet.

Vetëm gjatë mbrëmjes, rreth orës 22:30, gruaja u gjet e vdekur në banesën ku jetonte Fabian Vuka, e shtrirë në shtratin e dhomës së gjumit. Në pranga është vënë vëllai i viktimës, i cili është gjetur i rrethuar nga dhjetëra shishe birre, të cilat i konsumonte prej ditësh, pranë motrës së tij të vdekur.

Diana Vuka jetonte prej shumë vitesh në Gjermani dhe në Shqipëri vinte herë pas here për të parë të vëllanë që jetonte në lagjen “3 Dëshmorët” në Shkodër. Fabian Vuka ishte një person i varur nga alkooli dhe paraprakisht është raportuar se motër e vëlla kishin konflikte për këtë arsye.

Nuk dihet edhe nëse para vrasjes, debate ka nisur për të njëjtën çështje. Tashmë Fabian Vuka është vënë në pranga dhe pritet të merret në pyetje. Detajet e ngjarjes priten të zbardhen nga ekspertiza mjeko-ligjore të cilës i është nënshtruar viktima si dhe dëshmisë së autorit mbi shkaqet e krimit.