Shqiptari që “hyri” në parlament, grabiti bankën dhe qël loi policët

Krimet e regjistruara së fundmi në shtetin fqinj Greqinë, midis të cilave edhe një ekzekutim mafioz i një shqiptari, Aris Papas në një kafene në qendër të Athinës ka rikthyer edhe njëherë në parlament debatin mbi sigurinë.

Ministri i Mbrojtjes Civile Michalis Chrysochoidis teksa komentoi situatën e kriminalitetit në vend, hodhi akuza të forta ndaj qeverisë së majtë të SYRIZA-s që ishte në pushtet, pasi sipas tij ligji i njohur si “Paraskevopoulos” që miratoi, liroi kriminelët nga qelitë.

Ministri thotë se kriminelët që u liruan nga burgu ishin 117.

Për këtë, ministri mori një shembull konkret që lidhet me një shqiptar. Por c’kishte në thelb ky ligj? Me synimin për të lehtësuar mbipopullimin në burgje, ligji u dha liri të parakohshme të dënuarve me probleme shëndetësore.

Mirëpo, cili ishte rasti i shqiptarit që mori shembull ministri?

Bëhet fjalë për Neri Mustën. Ai u dënua me 14.5 vite burg, por bëri vetëm 4.5 vite dhe doli nga qelia duke përfituar nga ligji që miratoi qeveria e Tsipras.

Shqiptari u arrestua në 2015-n si bashkëpunëtor në dy vrasje, bashkë me Mondi Bajramin, mbi të cilin rëndonin edhe vrasje të tjera por më 12 korrik 2019 Musta u la i lirë.

Rritjen e frikshme të kriminalitetit, ministri grek e ilustroi me atë që bëri shqiptari 20 ditë pasi u lirua nga burgu. Në datën 5 gusht 2019, vetëm 20 ditë pas lirimit Musta mori pjesë në një grabitje banke në Parga. Prokurori i Prevezës lëshoi një urdhër për arrestimin e tij, por nuk u arrit të kapej.

Goditja e tij e radhës do të ishte pikërisht në 8 shkurt 2020, në kohën kur u organizua një operacion i madh policor për të arrestuar tre kriminelë shqiptarë që kishin kryer grabitje në Kalamata, Parga dhe disa qytete të tjera të Greqisë.

Policia tentoi t’i bllokonte në Korint, por kur kuptuan se u rrethuan, shqiptarët nxorën armët duke qëlluar në drejtim të policisë.

Policia u përgjigj po ashtu me zjarr dhe në fund u plagosën dy nga kriminelët. Njëri prej tyre u transportua drejt spitalit të Korintit dhe tjetri në Thriasio.

Nga një ndjekje e tillë, shpëtoi vetëm njëri dhe ende është i lirë, pikërisht Neri Musta, për të cilin janë lëshuar dy urdhër arreste.