Shkarkimi i Metës, kryeministri kërkon gjysmë ore kohë për ti thënë “lamtumirë” ish-aleatit të tij

Në kuvend ka nisur seanca ku do të vendoset për shkarkimin e presidentit të vendit Ilir Meta, teksa kryeministri Edi Rama jo vetëm që do të jetë i pranishëm, por do të mbajë edhe një fjalim prej 30 minutash.

Në listën e diskutantëve, kryeministri Rama është deputeti dhe përfaqësuesi i qeverisë që do të ketë kohën më të madhe në dispozicion për të folur.

Ai është kthyer ditën e sotme nga një vizitë zyrtare në Bullgari, dhe mësohet se ka zbritur në Rinas mëngjesin e sotëm, ku gjatë rrugës ka përgatitur po ashtu edhe fjalimin për ish-aleatin e tij qeverisës Ilir Meta, me të cilin rrugët politike duket se po ndahen përgjithmonë sot.

Në nisje të seancës është kreu i komisionit hetimor për shkarkimin e Ilir Metës, Alket Hyseni, ai i cili po lexon gjetjet, dhe shkeljet e kushtetutës të cilat sipas tij i ka bërë presidenti Kushtetutës, me qëndrimet e tij.

Sipas Komisionit, Ilir Meta ka gjetur rreth 30 shkelje të rënda që presidenti i ka bërë Kushtetutës, duke mos qenë i paanshëm në muajin prill që ishte edhe muaji i fushatës elektorale, ku pretendohet se ka bërë thirrje dhe për dhunë.

Pavarësisht votimit të sotëm në Kuvend, do të jetë Gjykata Kushtetuese ajo e cila do të thotë fjalën e fundit për shkarkimin e Metës, ndërkohë që vendimi pritet të sjellë sërish një ngërç dhe përplasje mes institucioneve.