“Problemi është drejt zgjidhjes” Situata alarmante me plehrat në Durrës, reagon kryetarja e Bashkisë

Pas situatës alarmante të plehrave në Durrës ka reaguar dhe kryetarja e Bashkisë së qytetit bregdetar Emirjana Sako.

Kjo e fundit mësohet se ka folur për këtë situatë gjatë mbledhjes së Këshillit Bashkiak dhe është shprehur se problemi është drejt zgjidhjes, duke paraqitur dhe skenarët e mundshëm që mund të aplikohen.

Ajo tha gjithashtu se ky problem duhet të zgjidhet nga instancat qeveritare, ndërsa shtoi se deri në momentin që të rregullohet kjo situatë, bashkia do të përdorë vetëm landfille të përkohshme.

“Problemi i depozitimit të plehrave është drejt zgjidhjes. Ai është në instancat qeveritare dhe pritet që ata të bëjnë vendimmarrjet e tyre. Bëhet fjalë për skenarin nr 2 që parashikon depozitimin e tyre në inçeneratorin e Sharrës. Derisa ky problem të zgjidhet bashkia po merr të gjitha masat duke përdorur landfille alternative. Ky problem do të zgjidhet shumë shpejt”– thotë Sako.