Përd hunimi i pastrueses shqiptare në Greqi, dëshmitarja: E gjeta të strukur dhe me fytyrë të deformuar nga rrahjet

Dalin në dritë të tjera detaje nga përdhunimi që iu bë një ditë më parë, një 50-vjeçareje shqiptare në Athinë.

Një grua, që ka parë të gjithë ngjarjen, ka rrëfyer në polici momentet e para kur është ndeshur me gruan nga Shqipëria.

“E gjeta gjysmë të zhveshur, me fytyrë të deformuar nga rrahjet. Ajo ishte strukur, ishte në gjendje të rëndë psikologjike”, mësohet të ketë thënë gruaja.

Përmendim që 50-vjeçarja shqiptare, ishte duke pastruar në një pallat, kur një i ri nga Bullgaria, e tërhoqi zvarrë në apartamentin e tij. Ai e ka përdhunuar gruan për orë të tëra, duke i shkaktuar dhe dëmtime të rënda në trup.

Gruaja aktualisht ndodhet në spital, nën kujdesin e mjekëve.

Mediat greke shkruajnë se autori i dyshuar, shtetasi bullgar është ende në kërkim nga policia. Efektivët po hetojnë të gjitha pistat, ndërsa nuk përjashtohet edhe mundësia që në përdhunim të jenë përfshirë më shumë se 1 person.