“Nuk kemi para” Ministri grek ngre alarmin: Nëse në vjeshtë shpërthen pandemia do falimentojmë

Ministri grek i Zhvillmit dhe Investimeve, Adonis Georgadis  u shpreh se nëse do të ketë një valë tjetër pandemië në vjeshtë, atëherë Greqia do të shkojë drejt falimentimit.

Gjatë një diskutimi me përfaqësues të bizneseve, Georgadis iu tha njerëzve që të mos ankohen për qeverinë, por nënvizoi faktin që qytetarët duhet të vaksinohen masivisht.

Sipas tij kjo është mënyra e vetme që ti jepet fund pandemisë.

“A doni që të mbyllemi sërish në dimër? Në rast të një mbylljeje tjetër nga pandemia do të na duhet të përballemi me faliment, pasi nuk kemi më para. Në vend që të ankoheni për qeverinë, thuajini artistëve që t’i bëjnë thirrje qytetarëve që të vaksinohen masivisht, në mënyrë që të mos jemi të detyruar që të mbyllemi gjatë dimrit”, tha ai.

Ai shprehet se Greqia do të ishte një vend më i sigurt epidemiologjikisht, nëse do të vaksinohej të paktën 50-60% e popullsisë gjatë muajve të verës.

Greqia u përball me një situatë të vështirë prej koronavirusit duke u detyruar që bizneset të qendrojnë mbyllur për disa muaj, ndërkohë që qeveria shpenzoi shuma të mëdha parash në formë subvencionesh për bizneset dhe individët e prekur prej masave të marra.