‘Ekzekutimet tregojnë etjen për tu hakmarrë’/ Gazetarja: Pushkatime publike! Prokuroritë kanë ngritur duart nga qielli

Të shumta janë vrasjet që kanë ndodhur ditët e fundit në vendin tonë, por më e frikshme është se kryhen ‘pa u fshehur’ , pasi janë kryer edhe para syve të fëmijëve, dëshmitarëve edhe kamerave të sigurisë.

Gazetarja Anila Hoxha tha në “Open” se është tepër shqetësues fakti që prokuroritë kanë ngritur duart nga qielli dhe nuk po zbardhin dot ngjarje që janë në formën e pushkatimit.

Anila Hoxha: Në disa qytete si Vlora dhe Elbasani, po vijnë nga përplasje jashtë vendit për trafikun e drogës. Në Vlorë po eliminohen disa persona në kohën kur ka fushatë ndaj kultivimit të kanabisit. Ajo që më shqetëson është dështimi total i prokurorive, të cilat kanë ngritur duart nga qielli, janë dorëzuar dhe nuk kanë zbardhur ende ngjarje që janë në formën e një pushkatimi publik.

Nuk frenohen para fëmijëve dhe grave, por edhe kur janë të sigurt që ka kamera sigurie, ka shumë sy njerëzish që shikojnë dhe kjo tregon etjen e njerëzve për të marrë doemos hak ose për të dhënë mesazhe për llogari të prishura ose gjoba të vendosura.