Dje e përmendi Çuçi/ Rama zbulon detajet nga “furtuna” në Policinë e Shtetit

Sot kryeministri Edi Rama sqaroi në konferencë deklaratën e ministrit të Brendshëm Bledi Çuçi përsa i përket një ristrukturimi të Policisë së Shtetit.

Ai foli për një moshë të re të efektivëve, fuqizim me anë të teknologjisë dhe performancë.

Kreu i qeverisë tha gjithashtu se duhet të funksionojë  çdo hallkë e shtetit në mënyrë që qytetarët të jenë të kënaqur.

PJESE NGA FJALA E RAMËS:

Në sensin e ristrukturimit të vazhdueshëm, për arritjen e moshës, integritetin dhe performancën e secilit dhe fuqizimin e Policisë së Shtetit me teknologji që shumëçka në aspektin e kontrollit të territorit të bëhet më mirë. Kjo është rruga, s’ka rrugë tjetër. Kur flasim për shtetin, shteti është qeveri, polici, prokurori e gjykatë. S’është punë faji kjo. Shkelja e ligjit është përgjegjësi personale, jo kolektive.

Nëse njëra nga hallkat nuk funksionon, kjo gjë më pas ka vështirësi. Mjafton të shihni trendin, shumë njerëz me emocionin e ngjarjeve tragjike, s’duan të shohin shifra dhe fakte, por shifrat dhe faktet orientojnë punën tonë. Është koincidencë por kishim kohë që punonim. Dua të nënvizoj se meqë ministrit ia kthyet fjalët përmbys dje, pavarësisht përgjegjësisë direkte, nuk ka arsye për të larë duart. Çdo ngjarje është arsye për të treguar sesi gjërat mund të bëhen më mirë dhe kur them që në ngjarjet në fjalë, sulmi ndaj Policisë është absurd, nuk kam parasysh që policia nuk mund të bëjë më mirë.