Detajet nga ngjarja në Korfuz/ Si qiraxhiu vrau pronaren dhe një tjetër fqinj

Mediet greke kanë zbardhur ngjarjen e rëndë në Korfuz, të Greqisë.

Dy nga viktimat në fakt u thanë se ishin çift, por nuk është kështu.

Viktima një pronare greke që jepte me qira apartamentet e saj, i kishte dhënë me qira ambientet dy viktimave të tjera.

Të tre viktimat jetonin në një banesë dy katëshe.

Në orën 11.30 të mëngjesit të ditës së sotme, 60-vjeçari nga Korfuzi, i cili jetonte në katin përdhes të ndërtesës pati një debat të ashpër me pronaren e ndërtesës dhe e qëlloi me armë gjahu.

Me 55-vjeçarin francez, i cili jetonte në katin e parë, autori i krimit nuk kishte asnjë konflikt. Ai u përpoq të ndërhynte për të shuar konfliktin dhe për të shpëtuar gruan, por u qëllua nga autori.

Fakti që ai vrau një person që nuk kishte lidhje me ngjarjen dhe nuk ishte fajtor bëri që 60-vjeçari t’i jepte fund jetës së tij. Mësohet se ai hyri në banesën e tij dhe qëlloi veten me të njëjtën armë.

Shtetasi francez humbi jetën në vend, ndërsa pronarja greke u dërgua në spital në gjendje të rëndë, por nuk mundi t’i mbijetonte dot plagëve të marra, shkruajnë mediet fqinje.

Sipas informacioneve të tjera, pronarja së bashku me qiramarrësin grek u përpoqën të dëbonin autorin e krimit nga banesa, sepse sipas vendasve, ai po i shkaktonte shumë probleme si fqinjit të tij viktimë ashtu edhe pronarit, me të cilin madje kishte bërë një marrëveshje verbale se nuk paguan qira, por do të kujdesej për kopshtin e kompleksit të apartamenteve.