LIGJET E BIZNESIT
Gjykata Kushtetuese nuk ka pranuar të shqyrtojë padinë e Kujtim Gjuzit në lidhje me zgjedhjet lokale që u zhvilluan më 30 qershor 2019 pa opozitën.
Kështu, çështja nuk do të kalohet në seancë.
Kujtojmë se padia e Partisë Konservatore u shqyrtua nga anëtarët e Gjykatës Kushtetuese Vitore Tusha, kryetare, Elsa Toska, Marsida Xhaferllari, Fiona Papajorgji, Altin Binaj, Sonila Bejtja, Përparim Kalo, anëtarë.
Gjykata Kushtetuese thekson se “Për legjitimimin e partive politike, Gjykata Kushtetuese ka vlerësuar se mundësia e tyre për të vënë në lëvizje kontrollin kushtetues ekziston kur ato kundërshtojnë dispozitat e akteve normative, të cilat cenojnë statusin e tyre kushtetues dhe, bashkë me të, edhe pjesëmarrjen e tyre në ushtrimin e vullnetit shtetëror.
Të tilla mund të jenë aktet që përcaktojnë deklarimin e pasurive, financimin e tyre nga shteti ose subjekte të tjera, dhënien e shansit të barabartë të gjitha partive për të marrë pushtetin, mënyrën e organizimit dhe të ushtrimit të veprimtarisë së tyre politike jo vetëm gjatë zgjedhjeve, por edhe në periudhën midis tyre”.
Sjellim në vëmendje që Partia Konservatore e Kujtim Gjuzit kërkoi shfuqizimin e zgjedhjeve lokale të 30 qershorit, të bojkotuara nga Partia Demokratike dhe LSI.
