Vetëvr itet aksidentalisht 10-vjeçari në Shkodër, inskenonte video për ‘Tik Tok’

Një ngjarje tragjike ndodhi një ditë më parë në njësinë e Gurit të Zi në Shkodër. Një 10-vjeçar me inicialet N.Y ka humbur jetën aksidentalisht, pasi po tentonte të bënte një video sikur po vetëvritej me qëllimin për ta hedhur në rrjetin social Tik Tok.

Dyshohet se kjo tentativë e vetëvrasjes së 10-vjeçarit, e nisur si një shaka, ka përfunduar në një tragjedi për atë, familjen e tij, të afërmit si dhe rrethin shoqëror.

Po sipas burimeve, shtetasi me iniciale N.Y. ndodhej i vetëm momentin e ngjarjes, kur po tentonte që të realizonte këtë video dhe papritur diçka nuk ka shkuar mirë për të, duke bërë që të humbë jetën në vetëm pak minuta.

Kanë qenë familjarët ata që e kanë gjetur të vetëvarur 10-vjeçarin. Familjarët janë munduar t’i japin ndihmën e parë, por ka qenë e pamundur, pasi fëmija kishte humbur jetën.
Në vendin e ngjarjes  kanë mbërritur po ashtu edhe forca të shumta policie dhe pas këqyrjes së vendit të ngjarjes nga hetimet paraprake rezulton se 10-vjeçari me inicialet N.Y ka dashur të bëjë një video në Tik Tok sikur po vetëvritej, por mjeti ku ai kishte hipur ka lëvizur dhe në këtë mënyrë ka mbetur i varur në pamundësi për të gjetur një mënyrë shpëtimi.

Forcat e policisë vijojnë hetimet për zbardhjen  e plotë të ngjarjes.