Në kërkim ndërkombëtar/ Ekstradohen nga Italia dy të shumëkërkuar, ja për çfarë janë dënuar

Ditën e sotme Interpol Roma ka ekstraduar drejt Shqipërisë dy shtetas të shpallur në kërkim ndërkombëtar.

Sipas informacioneve zyrtare, bëhet fjalë për shtetasin shqiptar Ardjan Hoxhaj, 49 vjeç, i shpallur në kërkim ndërkombëtar dhe është ekstraduar nga Roma/Itai drejt vendit tonë, pasi Gjykata e Apelit Vlorë e ka dënuar me 16 vjet e 8 muaj burgim, për veprën penale “Vrasje me dashje”, kryer në bashkëpunim.

Shtetasi Ardjan Hoxhaj, në vitin 1995, në Vlorë, ka vrarë duke e goditur me thikë në kraharor shtetasin A. A. dhe ka plagosur vëllanë e tij, shtetasin G. A.

Gjithashtu është kryer ekstradimi nga Italia drejt vendit tonë i shtetasit shqiptar Arian Katreli, 50 vjeç, të cilin Gjykata e Rrethit Gjyqësor Durrës e ka dënuar me 10 vite burgim, për veprën penale “Mashtrimi”.

Personat e ekstraduar në PKK Rinas i janë dorëzuar Drejtorisë së Përgjithshme të Burgjeve.