Mbijetoi nga tragjedia me teleferikun në Itali, zgjohet 5 vjeçari që humbi 5 familjarët

Eitani, djali 5-vjeçar i cili i mbijetoi tragjedisë në Mottarone të Italisë më në fund ka hapur sytë.

“Fëmija është duke u zgjuar ndërsa i kemi hequr edhe intubimin,” u shpreh drejtori i spitalit ku ai është duke marrë kujdes shëndetësor.

Ndërkohë, familja e tij është larguar nga morgu i Verbania dhe trupat e familjarëve janë duke u riatdhesuar në Izrael.

Kur ai u zgjua, pranë Eitan-it ishte halla e tij. Thuhet se pesëvjeçari e njohu menjëherë atë.

“Ai është ende i trullosur, por mund të marrë frymë vetë. Hallën e njohu dhe ajo po i qëndron pranë. Tani vjen pjesa më e vështirë sepse është i vetëdijshëm.”

Në praninë e të afërmve dhe psikologëve, pritet që t’i tregohet edhe e vërteta tragjike për familjarët që humbi nga rrëzimi i teleferikut.