LIGJET E BIZNESIT
Një grua amerikane pretendon se ka fituar 26 milionë dollarë në një llotari në Kaliforni, mirëpo nuk mund të tërheqë dot çmimin për arsyen e thjeshtë se nuk e ka biletën.
Gruaja shprehet se e harroi biletën e SuperLotto Plus në xhepin e pantallonave duke e larë më pas në lavatriçe.
Sipas mediave amerikane, pretendimet e gruas në fjalë konfirmohen nga pamjet e kamerave të pikës së shitjes ku dukej se kishte blerë një biletë lotarie, por vetë organizatorët thonë se diçka e tillë nuk mjafton.
Zëdhënëse e kompanisë organizatore të lotarisë, Cathy Johnston tha për mediat se vetëm pamjet e kamerave të dyqanit nuk janë të mjaftueshme për të vërtetuar pretendimin e gruas dhe se kërkohej “provë thelbësore bindëse se ajo ishte vërtet poseduese e biletës”.
Megjithatë, një kopje e videos është shpërndarë tek oganizatorët e lotarisë dhe pretendimi i gruas po hetohet më tej, konfirmoi zonja Johnston.
“Nëse nuk ka ndonjë fitues të njohur të çmimit të parë, brenda ditës së martë të javës së ardhshme, paratë do të shpërndahen si ndihmë shkollat publike të Kalifornisë”, thanë organizatorët në deklaratën e tyre.
Ndërkohë nga ana tjetër, shitësi me pakicë i cili shiti biletën fituese ka marrë 130,000 dollarë si pjesë e procedurës standarde të lotarisë.
