“Është pritë, mos dil” Si e paralajmëroi nëna Endri Mustafën një natë para se të ekzekutohej

Zbardhen detaje të reja nga ekzekutimi i Endri Mustafës në Livadhe në Shkodër.

Sipas bashkëshortes së tij Ingrit Mustafa, i riu ishte shpallur në kërkim prej disa kohësh, pasi ishte dënuar për fajde.

32-vjeçari ishte kthyer në banesë vetëm për Bajram më datë 13 maj.

Gjithashtu ajo ka shtuar se me datë 14 në banesën e tyre ka ardhur 15-vjeçari Ergys Malja, i cili i ka bërë një bisedë për t’i shitur një qengj për 40 mijë lekë të vjetra.

Paratë sipas saj, ia kishte marrë nënës. Ndërkohë Endri mësohet se i kishte thënë gruas se i kishte mbetur mendja tek një muhabet që i kishte bërë Ergys Malja.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Bashkëshortja e tij i është shprehur se i është drejtuar me fjalët ‘çfarë merresh me të, ai është fëmijë, është hajdut, pash Zotin mos u merr me të’.

Në atë kohë edhe nëna e Endrit ka qenë e pranishme në këtë bisedë ku i ka dhënë edhe një paralajmërim të fortë duke i thënë se rrezikohej të nxirrej në pritë.

‘O mami, ruaju prej tij se po të bën ndonjë prapësi dhe të nxjerrë në pritë dikund’.

Endri i është përgjigjur duke i thënë se nuk ka se çfarë t’i bëjë një fëmijë.

Nëna e tij më pas i ka thënë: ‘Ai është i poshtër, a të kujtohet që para një viti ky të ka thënë vetë që merr 3 mijë euro për të nxjerrë në pritë dikë tjetër.’

Pas këtyre fjalëve Endri ka vendosur që të shkojë me 15-vjeçarin për në zonën e Livadheve për të marrë një sasi hashashi, ndërsa më pas i është bërë pritë duke u ekzekutuar në vend.