Akuzohet për ekzekutimin e dyfishtë, arrestohet në Dubai ‘i forti’ i Elbasanit

Arrestohet në Dubai ‘i forti’ i Elbasanit Florenc Çapja.

Ky i fundit ishte shpallur në kërkim nga autoritetet shqiptare pasi akuzohet si organizator i vrasjes së dyfishtë të Gentian dhe Nezir Beqirit (babë e bir) në vitin 2012.

Për të njëjtën akuzë është pas hekurave dhe Ardian Çapja. Ndaj të dyve është caktuar masa e arrestit me burg pa afat.

Dosja e vrasjes së dyfishtë është rihapur pas rrëfimit të një të penduari të drejtësisë, se vrasja në 2012-ën u porosit nga Çapjat. Hetimet për rastin u kryen nga Drejtoria Qendrore e Policisë, ajo e Elbasanit dhe prokuroria e rrethit, që lëshoi urdhër-arreste për Ardian dhe Florenc Çapjan.

Vrasja e dyfishtë në vitin 2012

Gentian dhe Nezir Beqiri u ekzekutuan në shtëpinë e tyre në 15 gusht 2012, nga Jorgo Leku në bashkëpunim me Elvis Bardhin. Ata ishin paraqitur në shtëpinë e Nezir Beqirit si miqtë e djalit, Gentianit i cili ndodhej i paralizuar dhe në arrest shtëpie, pas një përplasje me policinë pasi ishte në kërkim për një tjetër ngjarje të rëndë të ndodhur në Elbasan.

Elvis Bardhi bashkë me Lekun, shkuan në shtëpinë e shokut të tyre Gentian Beqiri, duke përshëndetur policët e vendosur në hyrje të pallatit për të mbikëqyrur Nezirin. Ishte babai i shokut të tyre ai që i hapi derën pasi njohu shokët e djalit. Në atë moment Cani qëlloi me armë ndaj Beqirit duke e lënë të vdekur në vend.

Që pas ngjarjes, u raportua se pista e hakmarrjes me Çapjat mund të ishte motiv për ngjarjen, pasi Gentian Beqiri ishte një ndër tre personat që ekzekutuan Sokol Çapjan në një lokal në dhjetor 2005 në Elbasan duke çelur kështu serinë e hakmarrjeve mes familjeve në këtë qytet.

Pikërisht Elvis Bardhi është kthyer në bashkëpunëtor drejtësie dhe ka rrëfyer lidhur me krimin.