Rama për hapjen e aeroportit: Çunat e Kukësit që do vijnë nga Londra do i përzgjedhim në bazë të sharjeve

Kreu i qeverisë Edi Rama tha se shumë shpejt do të nisin fluturimet në aeroportin e Kukësit. Sipas tij, përzgjedhja e atyre që do fluturojnë të parët nga Londra drejt vendit tonë, do të bëhet në bazë të numrit të sharjeve dhe përqeshjeve.

Aeroporti i Kukësit për pak ditë hap dyer për uljen e parë të E-Albanias me çunat e Kukësit që do vijnë nga Londra të seleksionuar në bazë të numrit të sharjeve dhe përqeshjeve që më kanë bërë mua kur thoja që do bëjmë Aeroport në Kukës. Në Aeroportin e Tiranës fillon investimi për terminalin e ri dhe zgjatjen e pistës për të garantuar fluturimet transoqeanike.

Parqet fotovoltaike dhe transformimi i sektorit të energjisë që është vendosur në ekuilibër por vazhdon të na kushtojë kur kemi mungesë reshjesh. Të gjitha këto vijnë si rezultat i faktit që në këto dy mandate kemi ndërtuar një platformë të re që do e ngrenë Shqipërinë në një nivel tjetër. Korça e ka fituar statusin e një destinacion të preferuar. Për të gjithë ata turistë që do vijnë duke u shtuar jo vetëm në verë, do jetë më siguri një vend ku shumë më tepër do duan të vijnë. Me kompaninë që ndërton portin e Durrësit kemi nisur diskutimin për pikën turistike të Nikolicës për të ndërtuar resortin e parë të skive atje”, tha Rama.