Plagosja e sekretarit të PD, Basha mbërrin në Kavajë! Meta lajmëron se do i bashkohet me urgjencë

Pas Lulzim Bashës, Presidenti Ilir Meta njofton se do të niset drejt Kavajës pas plagosjes me armë zjarri në zyrat elektorale të PD-së në këtë qytet. Zëdhënësi i kreut të shtetit, Tedi Blushi në një postim në Facebook shprehet se për momentin Presidenti ndodhet në Elbasan në një iftar, por më vonë do të shkojë në Kavajë.

“Presidenti i Republikës, Sh.T.Z Ilir Meta po e ndjek me shumë shqetësim situatën në Kavajë.

Për shkak se aktualisht, Kreu i Shtetit ndodhet në Elbasan, në një iftar të organizuar nën kujdesin e Tij, me klerikët lokalë të pesë komuniteteve fetare, ku janë të ftuar edhe personalitete të nderuara të qytetarisë elbasanase, si dhe për shkak të një interviste të planifikuar më herët në TV “Skampa”, bëj me dije se menjëherë pas saj, Presidenti Meta do të niset urgjentisht drejt Kavajës.

Ndërkohë me qindra demokratë janë mbledhur para zyrës elektorale ku mbeti i plagosur 27-vjeçari Bledar Okshtuni mbrëmjen e sotme në Kavajë.

Ngjarja ndodhi rreth një orë më parë, ku Ndriçim Jonuzi plagosi me armë mbështetësin e PD Bledar Okshtuni. Policia bëri me dije se si pasojë e një konflikti për motive të dobëta mes tyre, Jonuzi ka hyrë në ambientet e brendshme të zyrës elektorale dhe ka plagosur me pistoletë në këmbë 27-vjeçarin. Ky i fundit është dërguar në spitalin e Durrësit, ndërsa autori është shpallur në kërkim.