Merkel u vaksinua/ Por pse nuk pamë asnjë foto? Zëdhënësi i kancelares zbulon arsyen

Ditën e sotme kancelarja e Gjermanisë Angela Merkel bëri vaksinën anti-C OVID19 të kompanisë Astra Zeneca.

Ky injeksion është nga më të diskutuarit e momentit, pasi ka shkaktuar jo pak polemika, pas dyshimeve se shkakton mpiksje gjaku.

Ndryshe nga më parë, në media nuk u panë foto të kancelares teksa bën vaksinën, siç ka ndodhur rëndom me liderët e tjerë që e kanë bërë live në praninë e kamerave

Nga njëra anë konspiracionistët mund të hedhin edhe dyshime nëse e ka bërë vërtet.

Por nga ana tjetër, zëdhënësi i saj Steffen Seibert ka postuar në Twitter një deklaratë të shkurtër të kancelares 66 vjeçare dhe foto me dokumentin ku ndodhet e shkruar emri i kancelares dhe lloji i vaksinës që ka bërë.

“Jam e kënaqur që kam marrë dozën time të parë sot me AstraZeneca. Falënderoj të gjithë ata që janë të përfshirë në fushatën e vaksinimit dhe të gjithë ata që vaksinohen. Vaksinimi është çelësi për të kapërcyer pandeminë”.

Angela Merkel u vaksinua në qendrën e ngritur në ish-aeroportin Tempelhof të Berlinit.