LIGJET E BIZNESIT
Kryesia e Kuvendit të Kosovës ka vendosur që seanca për zgjedhjen e presidentit të Kosovës të mbahet të shtunën në ora 18:00.
Lajmi është konfirmuar nga ushtruesja e detyrës së shefit të Grupit Parlamentar të Lëvizjes Vetëvendosje, Mimoza Kusari-Lila.
Vendimi për mbajtjen e seancës është marrë pas kërkesës së 41 deputetëve, tha ajo.
Për postin e presidentit kandidojnë: Vjosa Osmani dhe Nasuf Bejta. Që të dy në zgjedhjet e 14 shkurtit kanë kandiduar me Listën e Osmanit, që garoi në kuadër të listës së deputetëve të Lëvizjes Vetëvendosje.
Që prej 5 nëntorit, 2020, Kosova është me ushtrues detyre të presidentit, pasi Hashim Thaçi ka dhënë dorëheqje nga kjo pozitë, pas konfirmimit të aktakuzës për krime lufte dhe krime kundër njerëzimit nga Dhomat e Specializuara në Hagë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Opozita kërkon tërheqjen e ndryshimeve në ligjin për zgjedhjet e përgjithshme
Të premten pasi Qeveria e Kosovës paralajmëroi procedimin për shqyrtim në kuvend të ndryshimeve në Ligjin për Zgjedhjet e Përgjithshme, kryetari i LDK-së, Lumir Abdixhiku kërkoi nga kryeministri, Albin Kurti të ndalë “shantazhin ndaj opozitës”. Ai tha nëse një gjë e tillë nuk ndodh, atëherë Kurti, qëllimshëm do ta dërgojë vendin në zgjedhje të reja.
Kuvendi u mblodh të premten në mbrëmje në një seancë të jashtëzakonshme, mirëpo kërkesa për shqyrtimin me procedurë të shpejtë të Ligjit për Zgjedhjet e Përgjithshme nuk kaloi pasi opozita votoi kundër.
Ndryshimet e ligjit do t’i mundësonin diasporës të votojë në ambasadat dhe konsullatat e Kosovës nëpër botë.
Lidhja Demokratike e Kosovës thotë se propozimi për shqyrtimin e ligjit për zgjedhjet e përgjithshme nuk është tërhequr. Deklarata u bë nga shefi i Grupit Parlamentar të Lidhjes Demokratike të Kosovës, Arben Gashi, i cili e lëshoi mbledhjen e Kryesisë së Kuvendit.
“Ne si LDK presim që të tërhiqet ai projektligj, të merren garanci që do të kemi reformë thelbësore në aspektin e zgjedhjeve të përgjithshme sepse nuk ka emergjencë”, ka thënë Gashi.
Por, Kusari-Lila tha se u ka kërkuar përfaqësuesve të Lidhjes Demokratike të Kosovës që të konfirmojnë se në rast të dorëzimit të nënshkrimeve për tërheqjen e propozimit për shqyrtimin e ligjit, LDK-ja të garantojë se do të jetë në sallë për të votuar për kandidaten e VV-së për presidente.
Ushtruesi i detyrës së presidentit të Kosovës, Glauk Konjufca, përmes një deklarate për media të shtunën tha se ka marrë garancën e kryeministrit të Kosovës, Albin Kurti dhe kandidatës së Vetëvetëndosjes për presidente të Kosovës, Vjosa Osmani se “gjithçka që ka të bëjë me ligjin për zgjedhjet, do të jetë pjesë e një procesi të ardhshëm dialogimi mes mazhorancës dhe opozitës dhe se bashkë do ta bëjmë dhe përmbyllim reformën zgjedhore”.
Ndikimi në zgjedhjen e presidentit
Pa pjesëmarrje në votim të të gjithë deputetëve të LDK-së, Vetëvendosje do ta ketë të pamundur të zgjedhë presidentin e Kosovës.
LVV-ja ka 58 ulëse në kuvend, kurse Lidhja Demokratike e Kosovës i ka 15. Partia Demokratike e Kosovës ka 19 deputetë dhe Aleanca për Ardhmërinë e Kosovës ka tetë deputetë. Nga komunitetet, Lista Serbe, në zgjedhje i ka fituar dhjetë ulëset e garantuara; dy ulëse i ka fituar Partia Demokratike Turke e Kosovës dhe nga një ulëse kanë fituar partitë boshnjake Koalicioni Vakat, Partia e Re Demokratike, Unioni Socialdemokrat, sikurse edhe Partia Gorane, Iniciativa e Re Demokratike e Kosovës, Partia e Ashkalinjëve për Integrim, Iniciativa Rome, Lëvizja Përparimtare e Romëve të Kosovës.
Për zgjedhjen e presidentit, në dy votimet e para nevojiten dy të tretat e votave e që i bie 80 vota për të deputetëve.
Ndërkaq, në raundin e tretë, president zgjidhet ai që merr shumicën e thjeshtë prej 61 deputetësh, por në të tri votimet duhet të marrin pjesë të paktën 80 deputetë.
Nëse edhe raundi i tretë dështon, vendi shkon në zgjedhje të jashtëzakonshme, të cilat duhet të mbahen brenda 45 ditësh.
Pro votimit të Osmanit janë deklaruar komunitetet joserbe, ndërsa partitë opozitare, Partia Demokratike e Kosovës dhe Aleanca për Ardhmërinë e Kosovës janë shprehur kundër. Lista Serbe nuk është deklaruar./REL
