7 të vdekur me mpiksje gjaku pasi morën vaksinën

7 persona kanë ndërruar jetë nga mpiksjet e pazakonta të gjakut pasi morën vaksinën Oxford-AstraZeneca në Mbretërinë e Bashkuar.

Rregullatori i ilaçeve ka konfirmuar për BBC, se në total, 30 persona nga 18 milionë të vaksinuar kanë pasur probleme me mpiksjen e gjakut.

Ende nuk është e qartë nëse ato janë thjesht një rastësi apo një efekt anësor i vaksinës.

Agjencia Rregullatore e Barnave dhe Produkteve të Kujdesit Shëndetësor shprehet se përfitimet vazhdojnë të tejkalojnë çdo rrezik.

Sidoqoftë, shqetësimi ka bërë që vende të tjera të kufizojnë përdorimin e vaksinës vetëm për njerëzit e moshuar.

Të dhënat e publikuara nga Agjencia treguan 22 raste të trombozës së sinusit venoz cerebral (CVST) që është një lloj i mpiksjes së gjakut në tru.

Këto shoqëroheshin me nivele të ulëta të trombociteve, që ndihmojnë në formimin e mpiksjes së gjakut në trup.

Agjencia gjeti po ashtu probleme të tjera të mpiksjes së bashku me nivele të ulëta të trombociteve në tetë persona.