Po ministren pse jo? Rama shtyu dje gazetaren, ndërsa sot Evis Kushit pa maskë nuk i tha asgjë

Ditën e djeshme kryeministri Edi Rama tërhoqi vemendjen me një gjest të pazakontë, ku shtyu një gazetare për shkak se ajo nuk mbante maskën anti-C OVID19.

Ngjarja ndodhi ndërsa Rama po prononcohej për mediat në lidhje me vaksinimin e arsimtarëve, ndërsa gazetarja në fjalë iu afrua me mikrofon në dorë.

Kryeministri në fillim e pyeti se përse nuk po mbante maskë dhe më pas kur ajo i tha që e kishte harruar në makinë, e shtyu menjëherë duke ngjallur reagime të shumta në rradhët e opinionit publik.

Ndërkohë ditën e sotme, pas vizitës që bëri në qytetin e Elbasanit me rastin e Ditës së Verës, Rama bëri një tjetër prononcim për mediat, ku në krah kishte ministren e Arsimit Evis Kushi.

Kjo e fundit nuk po mbante maskë, shumë më pranë se gazetarja  e Fax News, e cila një ditë më parë u shty nga Kryeministri.

Rama e dëgjoi Kushin qetësisht, as e shtyu as i tërhoqi vëmendjen. Madje pak sekonda më pas edhe vetë kryeministri teksa mori fjalën hoqi maskën.

As Rama dhe as Kushi nuk e shtynë njëri-tjetrin, ashtu sikundër veproi Kryeministri vetëm 24 orë më parë, ndaj një gazetareje.

Duket se Rama e ka inatin me gazetarët, që herë i tall, herë i vendos nën presion dhe herë i shtyn.