LIGJET E BIZNESIT
Gjykata Administrative e Vlorës është futur në një ngërç i cili po pengon punën me proceset gjyqësore. Kjo pasi dy gjyqtarë janë në konflikt mes tyre.
Bëhet fjalë për gjyqtarët Ken Dhima dhe Bevis Shehaj. I pari akuzon kolegun më të ri si të paaftë për vendimet gjyqësore që jep, ndërsa i dyti ka bërë padi në institucionet më të larta.
Përplasja fizike mes tyre është regjistruar nga kamerat e sigurisë së gjykatës administrative të Vlorës dhe video ndodhet ende në serverat e kësaj gjykate. Të kontaktuar nga Top Channel, drejtuesit e gjykatës thonë se videon mund ta marrë vetëm prokuroria nëse ka një hetim për ngjarjen.
Përplasja mes gjyqtarëve, Bevis Shehaj dhe Ken Dhima ka penguar edhe punën e gjykatës. Burime nga gjykata thonë se gjyqtarët që kanë zyrat në të njëjtën ndërtesë dhe fare pranë, kur kanë gjyqe në të cilat duhet të jenë bashkarisht, komunikimin e mbajnë nëpërmjet postës. Pas këtyre incidenteve dhe sjelljeve prej adoleshentësh, gjyqtarët në fjalë vijojnë në të njëjtën situatë pa asnjë masë ndaj tyre. Shkak i përplasjes janë disa vendime gjyqësore të cilat mesa duket kanë interesa përtej atyre ligjore që për t’u zgjidhur po përdoren edhe grushtet.
Gjyqtari Bevis Shehaj ka dhënë vendim në vitin 2020 për të përjashtuar si gjyqtar kolegun e tij Ken Dhima nga një çështje gjyqësore për një konflikt pronësie në një pallat të ri në Lushnjë. Më pas Ministria e Drejtësisë ka marrë një ankesë nga pala tjetër në konflikt kundër gjyqtarit Ken Dhima dhe ndaj tij ka hapur një hetim disiplinor.
Hetimi është hapur me shkurtin dhe gjyqtari bën përgjegjës kolegun e tij Bevis Shehaj.
