Gjithçka shkoi mirë! Johnson poston foton pas vaksinimit me AstraZeneca. Britania rekord vaksinimesh

Kryeministri britanik, Boris Johnson ka marrë dozën e parë të vaksinës së prodhuar nga AstraZeneca, një ditë pas vendimit pro saj të Agjencisë Europiane të Barnave.

Johnson i cili e kaloi covid vitin e kaluar, u kthye në të njëjtin spital për të marrë dozën e parë të vaksinës, ku tha se “nuk ndjente asgjë” dhe inkurajoi njerëzit të bënin të njëjtën gjë.

Në 24 orët e fundit autoritetet e shëndetësisë atje bënë me dije se janë vaksinuar mbi 660 mijë persona, shifër kjo rekord që nga nisja e procesit të vaksinimit.

Të dhënat zyrtare nga Mbretëria e Bashkuar bëjnë me dije se deri në këto momente 26 milionë persona e kanë marrë dozën e parë të vaksinës ndërsa 2.01 milionë i kanë marrë të dyja.