Deklarata e Luljeta Bozos për komunizmin, vjen reagimi i pedagoges së njohur: Nuk është model për brezin e ri

Inxhinierja Luljeta Bozo e cila kandidon e para si deputete në Tiranë për zgjedhjet e 25 prillit, u shpreh se sistemi komunist në Shqipëri ka patur më shumë anë pozitive se negative.

Menjëherë këto fjalë sollën një reagim shumë të madh në rradhët e opinionit publik.

Një nga zërat që pozicionohet kundër deklaratës së  inxhinieres 78-vjeçare është pedagogia e njohur Jonila Godole, duke kërkuar dhe një sqarim.

Profesoresha e Fakultetit të Histori-Filologjisë në UT kërkon dhe reagimin e Partisë Socialiste për deklaratën që e quan të pavend.

Godole sjell në kujtesë rezolutat që janë miratuar nga parlamenti e që pohojnë krimet makabre të sistemit dhe mungesën e lirisë.

“Më e pakta që ajo mund të bënte është të kërkojë ndjesë publike për glorifikim të një regjimi që vrau, burgosi mijëra burra e gra, dhe internoi e persekutoi mijëra familje për gjysmë shekulli. Para kësaj panorame vrastare sistematike, gjithë ‘sukseset’ e tjera janë të papërfillshme. Ky nuk është modeli i përfaqësuesit të shtetit që mund t‘i ofrojmë brezit të ri dhe shoqërisë shqiptare”, shkruan Godole.

Ajo shton se deklarata e kandidates për deputete, në një kontekst të ngjashëm në një shtet demokratik perëndimor, në mos do të sillte pasoja deri edhe ligjore për këdo që relativizon apo glorifikon publikisht krimet e diktaturës, do të përballej me kritikë të prerë nga ana e një partie që operon mbi vlera demokratike.

“Sepse nuk mjafton vetëm që lista të ketë kandidatë të pastër, të parrokuptuar dhe pa lidhje kriminale, por edhe që ata të mos glorifikojnë e justifikojnë krimet e regjimit të djeshëm. Kush mbyll sytë para krimit të djeshëm, nuk e ka për gjë të justifikojë të sotmin. Përndryshe çdo premtim për pastërti figure është demagogji”, përfundon Godole.

(Në fotot më poshtë, reagimi i plotë)