LIGJET E BIZNESIT
Një nga ngjarjet më të rënda të kronikës së zezë së fundmi është ekzekutimi i biznesmenit Behar Sofia mëngjesin e 25 shkurtit, pranë zonës së Piramidës në Tiranë.
Ndërkohë policia ka arrestuar një grup vrasësish me pagesë që kanë lidhje të drejtpërdrejtë me krimin.
Operacioni policor “Piramida” çoi në pranga Ernejt Shyti, 24 vjeç, lindur dhe banues në Tiranë, Skënder Vathi, 54 vjeç, lindur në Arrameras, Fushë Krujë dhe banues në Tiranë, Leonar Xhixha, 30 vjeç, lindur dhe banues në Arrameras, Fushë – Krujë, i dënuar më parë për veprën penale “Vrasja me paramendim” ngelur në tentativë dhe Xhuljano Visha, 28 vjeç, i dënuar më parë për veprën penale “Vjedhja”.
Sipas Policisë, këta shtetas, në bashkëpunim me njëri – tjetrin, kanë organizuar vrasjen e Behar Sofisë, duke siguruar mjetet, armën, si dhe kanë mbajtur nën mbikëqyrje lëvizjet e viktimës për disa kohë, deri në momentin e ekzekutimit të tij.
Ndërkohë kanë dalë për herë të parë dhe pamjet, ku autori Ernejt Shyti e ka ndjekur viktimën duke përdorur dhe një teknikë specifike që të mos dallohej.
Me duar në xhepa ai kryen ecejake duke çaluar për disa minuta përpara se ta vrasë.
Ernejt Shyti, i cili mban në kokë një kapuç dhe një xhup dimëror me bindjen se nuk do të zbulohej. Ai kapërcen trotuarin midis makinave dhe në të njëjtin çast shënjestra e tij Behar Sofia kalon me vrap vijat e bardha. Ky veprim shtyn vrasësin të kthehet pas, e shikon përballë për t’u bindur që ai është personi që i kanë treguar në fotografi dhe më pas i vihet pas për ta qëlluar pas shpine.
Ky maskim nuk e shpëtoi dot Ernejt Shytin që mos të zbulohej nga autoritetet të cilat kryen ekspertizë në Britaninë e Madhe për të konfirmuar që ky është një improvizim.
