Vasili bën deklaratën e fortë/ “Vdekjet dhe infektimet nga më të lartat në botë, asnjë ndihmë nga qeveria

Nënkryetari i LSI-së, Petrit Vasili deklaroi ditën e sotme se vdekjet dhe infektimet nga Coivd-19 në Shqipëri janë nga më të lartat në botë ndërsa shtoi se nuk ka pasur asnjë ndihmë nga qeveria.

“Është një fakt shumë i rëndë që shifrat e vdekshmërisë, por edhe të prekjes dhe infektimit të qytetarëve, janë në nivelet më të larta botërore. Pra vdekshmëria dhe infektimet janë në nivelet më të larta botërore”, tha Vasili.

“Është shumë e qartë për këdo, që të gjitha llojet e masave të marra ishin masa politike dhe elektorale. Kufizimet pa kuptim, mbyllja me orare pa asnjë vlerë, gjobitja e dhjetëra mijëra qytetarëve, mbi 80 e ca mijë qytetarë janë gjobitur, ishin sigurisht masa të cilat kishin kuptim vetëm që të krijonin presion, në emër të qëllimeve politike dhe jo në emër të përballimit të pandemisë”, u shpreh Vasili.

“Opozita pa reshtur e ka bërë dhe do ta bëjë punën e saj. Duke treguar rrugën sesi zgjidhet kjo çështje. E kemi treguar në mënyrë profesionale. E kemi këshilluar. Kemi treguar se në ç‘mënyrë duhet të veprojnë”, tha ai.