LIGJET E BIZNESIT
Fenomeni i korrupsionit dhe mitmarrja në spitalet shqiptare është kthyer në problem të përditshëm dhe tepër shqetësues për shoqërinë tonë. Mjekja shqitare, e cila punon në Gjermani, Marsela Ceno, tha për Euronews Albania se kjo problematikë në vendin tonë është prezente prej 30 vitesh.
Sipas saj, sistemi shëndetësor ka në bazë mitmarrjen, që fillon nga procesi i përgatitjeve të mjekëve, caktimin e specializimeve dhe deri tek hallka e fundit te shërbimi ndaj pacientëve.
“Sistemi shëndetësor në Shqipëri ka një sëmundje kronike, e cila ka filluar para 30 vitesh, por shumë e theksuar në dhjetë vjeçarin e fundit. Sistemi ka në bazë mitmarrjen, qoftë në nivelin e përgatitjes së mjekëve, ashtu dhe në procesin e shpërndarjes së specializimit dhe deri tek hallka e fundit, shërbimi ndaj pacientëve. Kjo tregon dobësinë e sistemit në tërë vendin. Ky është një problem kronik tashmë”, tha ajo.
Gazetarja pyeti mjeken se si mund të luftohet fenomeni i korrupsionit dhe ryshfeti në institucionet spitalore, për këtë znj. Ceno listoi disa zgjidhje.
“Ngritja e pagës, krijimi i një sindikate që përfaqëson mjekun dhe mbron interesat e tyre, sigurinë e tyre, dhe përmirësimi i infrastrukturës do të rrisnin performancën e mjekëve në Shqipëri”, u shpreh ajo.
Ajo theksoi se një ndër arsyet, të cilat i shtyjnë mjekët shqiptarë të lënë Shqipërinë është pasiguria që ato hasin në vendet e tyre të punës.
“Arsyeja kryesore e largimit të mjekëve shqiptarë drejt Gjermanisë është pasiguria e tyre në punë, mungesa e mbrojtjes së tyre nga shteti apo institucionet përgjegjëse”, theksoi ajo.
