LIGJET E BIZNESIT
Shoqata Shqiptare e Energjisë së Rinovueshme (AREA) ka publikuar provat që dëshmojnë se Bashkia e Kukësit rriti taksat në kulmin e pandemisë. Më datë 24 dhjetor, AREA I kërkoi qeverisë që të reagonte për të bllokuar bashkinë e Kukësit që të rriste disa taksa e tarifa vendore në kulmin e krizës ekonomike të shkaktuar nga Covid-19, e cila ka goditur rëndë biznesin e sipërmarrjet.
Një ditë pas kërkesës së AREA, kryetari i Bashkisë së Kukësit, z.Safet Gjici, deklaroi në media se nuk ishte e vërtetë që ishin rritur taksat për linjat e energjisë elektrike apo internetit.
Por nëpërmjet një njoftimi për shtyp, AREA ka bërë të ditur se disponon prova se Bashkia e Kukësit i rriti taksat, ndryshe nga sa deklaronte publikisht kryetari i saj, z. Safet Gjici.
Sipas njoftimit, dokumentat zyrtarë të mëposhtëm e vërtetojnë këtë.
Një biznes që operon në territorin e Bashkisë së Kukësit ka marrë këto ditë një faturë prej 6,259,784 lekësh (të reja), si taksa për vitin 2021. I njëjti biznes, për vitin 2020 ka paguar 5,976,784 lekë (të reja) ose 283,000 lekë (të reja)më pak sesa paguan për këtë vit.
Gjeni më poshtë dokumentat “Taksat 2020 biznesi X, Taksat 2021 biznesi X”
Një tjetër biznes ka marrë një faturë prej 10,504,757 për të paguar taksa për bashkinë e Kukësit për vitin 2021, ndërsa po i njëjti biznes ka paguar 9,870,269 ose 634,488 më pak sesa do të paguajë këtë vit. Gjeni më poshtë dokumentat “Taksat 2021 biznesi Y, Taksat 2020 biznesi Y”.
Siç shihet në dokumentat zyrtarë, bizneset do të paguajnë më shumë taksa për linjat e tensionit.
“Bashkia e Kukësit është bërë qesharake duke konsideruar si hapësira publike edhe sipërfaqet e HEC-eve apo ato të shtyllave elektrike të ndërtuara mes maleve, për të cilat kompanitë kanë paguar më parë detyrimet e tyre që në periudhën e ndërtimit.
AREA e konsideron rritjen e këtyre taksave si absurde dhe si provë të frymës anti-biznes që po godet sipërmarrjet prodhuese në një kohë të vështirë për të gjithë sektorët, si pasojë e pandemisë, duke e bërë bashkinë e Kukësit të vetmen bashki në botë që rëndon biznesin në kohë krize”, theksohet në njoftimin për shtyp të Shoqatës Shqiptare të Energjisë së Rinovueshme.
Ndërkohë që AREA risjell në vëmendje faktin se tarifa shtesë e vendosur për HEC-et për herë të parë në vitin 2020, e llogaritur për MË të fuqisë së instaluar, megjjthëse është e paligjshme, vazhdon të figurojë në faturat e tarifave dhe taksave të këtij viti.
AREA ripërsërit thirrjen drejtuar kryeministrit Edi Rama që të ndërhyjë për ta detyruar Bashkinë e Kukësit që të tërhiqët nga klima armiqësore që po krijon ndaj biznesit, duke e rënduar sipërmarrjen prodhuese të një prej sektorëve më të rëndësishëm të ekonomisë me shtim të tarifave e taksave vendore, çka dëmton jo vetëm biznesin, por edhe qyetarin. Çdo taksë e rritur ndaj biznesit në mënyrë të paligjshme, jo proporcionale është një barrë jo vetëm për bizneset, por edhe për punëmarrësit, qytetarët dhe ekonominë kombëtare.
Rritja e taksave nuk është parashikuar në planet e biznesit të investitorëve. Nëse qeveria e lejon rritjen e taksave, ajo duhet të rimbursojë prodhuesit me të njëjtën vlerë sa rritja respektive e taksave.
“Gjatë vitit 2020, për vlerën që Bashkia e Kukësit ka vjelur nga prodhuesit për tarifën shtesë për mbrojtjen e mjedisit, kjo bashki u ka ofruar 0 lekë shërbim HEC-eve, siç do të duhet të ndodhte, që taksat të përkthehen në shërbime”, thekson AREA.
