Rama kërkoi mandatin e tretë, Basha nuk e lë ‘rehat’: Edi, ik rri me familjen tënde

Pas kërkesës që kryeministri Rama u bëri qytetarëve që ta votojnë për mandatin e tretë, ka ardhur reagimi i liderit të PD Lulzim Basha.

Ky i fundit shprehet se rama ka patur 8 vite kohë në pushtet, por e la Shqipërinë në vend numëro.

Sipas tij, vendi ynë nuk e ka luksin që ti japë kreut të qeverisë dhe 4 vite të tjera.

Basha i thotë Ramës të ikë dhe të rrijë me familjen e tij, pasi sipas kryedemokratit, njerëzit e sojit të Ramës përpiqen t’i bindin të tjerët se po të kenë edhe 4 vjet kohë do të arrijnë gjithçka, por e vërteta është se kjo nuk ndodh kurrë.

REAGIMI I PLOTE:

Edi, njerëzit e sojit tënd përpiqen t’i bindin të tjerët se po të kenë edhe 4 vjet kohë do të arrijnë gjithçka. Por e vërteta është se kjo nuk ndodh kurrë.

Nuk ndodhi as pas 4 viteve të para, por prapë i kërkove Shqipërisë të ta jepte timonin vetëm. E more edhe 4 vjet të tjerë dhe prapë e le në vend numëro.

Ti e ke lënë Shqipërinë në baltë, Edi.

Ekonomia ka ngecur.

Premtove ulje taksash dhe çmimesh por dështove dhe i rrite taksat dhe koston e jetës për çdo shqiptar.

Punësimi ka ngecur.

Premtove 300 mijë vende pune por dështove  dhe largove qindra mijë nga puna.

Shëndetësia ka ngecur.

Premtove shëndetësi falas dhe e cove në kolaps e i grive shqiptarët nga xhepat para dhe gjatë pandemisë.

Hyrja në Europë ka ngecur.

Premtove hapjen e negociatave para 8 vitesh dhe vetëm sa shtove kushtet prej dështimeve të tua.

Edi ti kishe 8 vjet pushtet si askush para teje dhe pas 8 vjetësh vendi ka ngecur vendnumëro.

4 vite të tjera nuk të duhen për shqiptarët, sepse për ta nuk të bëhet vonë. 4 vjet të duhen për vete dhe ortakët e tu që pasurohen me milionat e tenderave dhe koncesioneve korruptive.

Shqipëria nuk e ka luksin të të japë edhe 4 vite të tjera, që të përfundojë sërish si në fund të këtyre 4 viteve. Ngecur vend numëro, pa të ardhme, pa shpresë, pa ëndrra.

Ik rri me familjen tënde.

Shqipëria do të ecë para. Dhe tani që të gjithë e dinë se kjo nuk mund të ndodhë me ty.