“Nuk të detyron njeri të hipësh” Zv. ministrja Rakacolli flet për mbushjen e autobuzëve plot

Zv.ministrja e Shëndetësisë Mira Rakacolli e cila është njëkohësisht dhe kryetare e Komitetit Teknik është pyetur sot nga gazetarët se cilat janë masat e marra në lidhje me mbushjen e autobuzëve plot.

Në mbledhjen e sotme, ajo deklaroi se njerëzit nuk i detyron njeri të hipin në urbane dhe në momentin që i shohin autobuzët plot të mos i përdorin.

“Vazhdojmë të kemi fëmijë të infektuar. Ka një përmirësim të lehtë pavarësisht se kemi ende të infektuar. Për kontrollet në urbane, vijojnë të bëhen. Gjithsesi zgjedhja është personale. Nuk arrihet suksesi me forcë. Nuk të detyron njeri të hipësh në urban, kur shihet që është plot nuk hipet. E kuptojmë që njerëzit nxitojnë të kapin oraret e punës, por që duhet të kujdesemi për vetën dhe familjarët. Gjithsesi, inspektoriati është duke punuar”, tha Rakacolli.

Kujtojmë se autobuzët në Tiranë mbushen plot zakonisht në mëngjes dhe ky është kthyer në një shqetësim të madh pasi mund të përbëjë një rrezik për përhapjen e virusit C OVID19.