LIGJET E BIZNESIT
Dy muaj para zgjedhjeve elektorale kryetarja e LSI Monika Kryemadhi ka bërë një premtim të madh në stilin e liderit opozitar Lulzim Basha.
Sipas saj forca politike që ajo përfaqëson do të vendosë një kontroll rigoroz për cilësinë e karburanteve dhe do të realizojë një ulje të ndjeshme të kostos së tyre në rreth 20% duke hequr taksën e qarkullimit.
“Shqiptarët jetojnë në një vend të bukur dhe të bekuar nga Zoti, me malet fisnike , me fushat, detin e ajrin si askush tjetër. Por keqshfrytëzimi dhe papërgjegjshmëria e kanë ndotur mjedisin duke e bërë shpesh të rrezikshëm për jetën e njerëzve dhe një mundësi të munguar për turizmin. Ne do të mbrojmë dhe kthejmë në normalitet ambientin, tokën, ujin dhe ajrin nga ndotja e nga zhvillimi industrial i papërgjegjshëm.
Ne do të mbështesim energjinë e gjelbër dhe këdo që përdor panelet diellore për përdorim shtëpiak. Do të reformojmë standardet e ruajtjes së energjisë në ndërtim dhe ato antisizmike, që t’i bëjmë ndërtesat më të sigurta dhe më pak të kushtueshme për shqiptarët.
Do të vendosim një kontroll rigoroz për cilësinë e karburanteve dhe do të realizojmë një ulje të ndjeshme të kostos së tyre në rreth 20 % duke hequr taksën e qarkullimit. Ne e mbajmë fjalën! Shqipëria shtëpia juaj! ”, shkruan Kryemadhi.
