Ndodh çudia/ Banorët vlojnë ujin e çezmës para konsumit, pasi mund të jetë i ndotur

Gati 12 milionë njerëzve në Teksas iu është komunikuar që të vlojnë ujin e çezmës përpara se ata ta konsumojnë, pasi një stuhi vdekjeprurëse shkaktoi ndërprerje të energjisë në impiantet e trajtimit.

BBC shkruan se stuhia e madhe që përfshiu jugun e SHBA-së ka lënë të vdekur rreth 50 persona si dhe ka lënë miliona njerëz pa energji elektrike.

Teksasi është përballur me ndërprerje të shpeshta të energjisë elektrike.

Temperaturat e ulëta kanë shkaktuar gjithashtu plasaritjen e tubave të ujit, pavarësisht përpjekjeve të pronarëve të shtëpisë për t’i izoluar ato nga i ftohti duke përdorur batanije.

Presidenti, Joe Biden, ka shpallur gjendjen e jashtëzakonshme në Teksas, vend i cili është mbuluar nga bora dhe akulli që kur stuhia përfshiu vendin në fundjavë.

Qyteti i Houstonit ka lëshuar njoftimin për të vluar ujin,  derisa Qendra për Kontrollin dhe Parandalimin e Sëmundjeve këshillon që i gjithë uji për konsum – edhe nëse filtrohet – duhet të zihet, kjo pasi mund të jetë i kontaminuar.

Duhet të përdoret vetëm uji i zier ose ai në shishe. Këtu përfshihet edhe larja e dhëmbëve.