LIGJET E BIZNESIT
Ndonëse nga spitalet COVID marrim shpesh lajme të trishtuara dhe trajtohen pacientë të infektuar, ka edhe raste ku ndodhin dhe mrekulli. I tillë është edhe rasti i lindjes së një djali.
Prof Asc. Alma Cani, shefe e reanimacionit tek Shefqet Ndroqi, u shpreh se në këtë spital ka ardhur në jetë një djalë, nga një nënë e infektuar me COVID-19 dhe që ishte në gjendje të rëndë.
Fëmija gëzon shëndet të plotë. Mjekja Alma Cani tha se nëna shtatzënë erdhi me probleme pneumonie për shkak të Koronavirusit dhe komplikacionet si pasojë e virusit kanë sjellë një lindje të detyrueshme.
“Para 4 ditësh është shtruar në spital, është rëndë dhe vjen me pneumoni nga COVID. Në momentin e ardhjes gjendja ishte e rënduar dhe u trajtua me oksigjen. Ditën e djeshme nga problematika dhe komplikacionet ka pësuar arrest kardio-respirator ku u fut në frymëmarrje artificiale dhe në një kohë rekord brenda 45 minutash u realizuar provokimi i lindjes pasi gjendja që vjen si pasojë e COVID çon në rrezikun e situatës duke sjellë dhe humbjen e bebit. Në këto kushte në bashkëpunim me kolegët e maternitetit “Koço Gliozheni” u realizua për 45 minuta asistenca në sallat tona të operacioni ku u bë lindja e bebit, një djalë, fatmirësisht çdo gjë shkoi më së mirë. Fëmija është transferuar në maternitet ku aty është dhe asistenca për bebet. Fëmija është mirë dhe nëna ruan mirë parametrat jetësor, ne po vazhdojmë ta mbajmë nën monitorim gjendjen e saj”, tha mjekja Cani.
