Masat shtrënguese/ A do të mbyllet Shqipëria në orën 18:00? Ja si përgjigjet Skënder Brataj

Kreu i Urgjencës Kombëtare Skënder Brataj ka folur së fundmi në lidhje me situatën e pandemisë në vend.

Duke qenë njëkohësisht dhe anëtar i Komitetit Teknik, ai ka deklaruar se në rast se situata do të shkojë drejt përkeqësimit, mund të rishikohen masat shtrënguese.

“Ishte takim shumë pozitiv, me pjesëmarrje nga kolegë nga të gjitha vendet e botës. Terapia nuk është se ndryshon shumë nga një vend tjetër i botës. Unë e kam thënë dhe e them që të gjendet një mënyrë bashkëpunimi konkret si të ardhjes së këtyre kolegëve dhe dërgimit të kolegëve këtu për bashkëpunim. Prandaj edhe me diasporën unë dua gjëra konkrete, duhet të realizojmë projekte konkrete”,- tha Brataj në studion e lajmeve të “News 24”.

I pyetur nëse do të ndryshojë ora policore, Brataj u shpreh se tre ditët e fundit shifrat janë disi konstante.

“Në dy apo tre ditët e fundit rritjet janë stabilizuar, pra po arrijmë në atë fazën e sheshtë, më pas nis zbritja. Edhe një minimum pak më pozitiv tregon menaxhim e kontroll të situatës. Po diskutohet për masa të tjera, po bëjmë të njejtën gjë si vnedet e tjera. Do të shohim së shpejti situatën dhe do vendosim. Nëse ka përkeqësim nuk mund të tolerojmë situatën. Kritike për mua është edhe pranvera”- shtoi ai.