“Lajm shumë i mirë” Rama reagon për herë të parë pas arrestimeve në spitalin “Shefqet Ndroqi”

Mesditën e sotme kryeministri Edi Rama ka dalë në një konferencë me gazetarët.

Në fokus të bisedimeve është tema e shëndetësisë.

Gjatë fjalës së tij, kreu i qeverisë e ka cilësuar si një lajm shumë të mirë arrestimin e 3 infermiereve dhe një sanitareje në spitalin “Shefqet Ndroqi”, që bashkëpunuan me Tire Alldervishin.

“Duke filluar nga lajmi shumë i mirë i prangosjes edhe katër, në kuadrin e hetimeve të thelluara që nisën pas hetimeve të thella, pas emisionit investigativ.

Është një lajm shumë i mirë se është një mesazh i qartë për qytetarët që nuk duhet të ngurrojnë të denoncojnë në çdo drejtim që e shohin të arsyeshme, përfshi edhe mediat investigative, që gjej rastin t’i falenderoj për punën, si dhe për këtë rast kaq skandaloz dhe domethënës.

Është një mesazh i qartë për të gjithë atë pjesë të trupës të bluzave të bardha, që për fat të mirë është një pakicë e vogël por e mjaftueshme për të ndotur imazhin e bluzave të bardha, dhe rrugën e transformimit të kushteve dhe performancës.

Është një mesazh i qartë edhe për të ardhmen, pasi besoj që kura afatgjatë dhe e suksesshme për të adresuar plagën kanceroze të rryshfetit në sistemin shëndetësor është thellimi i reformës së sistemit. Reformë që ne e kemi nisur dhe tani jemi në hapin e madh të autonomisë spitalore”, deklaroi Rama gjatë fjalës së tij.