“Kisha nevojë për një rebel” Nano zbulon si e ftoi Ramën në politikë: Brodhëm një natë rrugëve të Parisit

Në rrëfimin e tij Fatos Nano është kthyer pas në kohë duke zbuluar se si e ka bindur kryeministrin e tanishëm Edi Rama që të hynte në politikë.

Ai ka treguar në “Opinion” se kishte nevojë për një rebel në rrethin e socialistëve, një njeri me ide novatore sipas tij që të provokonte mendimin e ndenjur që kishte trashëguar.

PJESE NGA INTERVISTA

Fevziu: Përse vendosët ta thërrisnit Ramën në qeveri në 1998 kur nuk njihej për karrierën politike dhe njihej si njeri problematik dhe polemist, a u penduat më pas për këtë?

Nano: Shumica e pjesëmarrësve të rinj në politikë nuk kishin përvojë politike. Kështu që nga kjo pikëpamje Rama nuk mund të stononte. E dyta unë kisha arritur të flas me Edin, gjatë dy viteve të mia në Paris kur takova Zhospenin, mars- prill 1998. U takuam natyrshëm.

Fevziu: Në atë kohë nuk kishit idenë për ta ftuar?

Nano: Aty e ftova. Kemi harxhuar një natë të gjatë duke bredhur rrugëve të Parisit, sa u mbyllën lokalet. Dhe ai ishte i shoqëruar me gjermankën atëherë, partneren e tij dhe ajo i thoshte: Dëgjoje ka të drejtë. Unë e fotja ai hezitonte. Arsyeja ishte njerëzore. Unë kisha nevojë për një rebell në rrethin e socialistëve. Një njeri me ide novatore që të provokonte mendimin e ndenjur që trashëgova. Dhe isha i sinqertë në këtë ftesë.