“Ishte një shkëndijë e brendshme” Rrëfimi i Luljeta Bozos jashtë profesionit, tregon njohjen me bashkëshortin

Inxhinierja Luljeta Bozo njihet si një nga njerëzit më ekspertë në dhënien e opinioneve, kryesisht pas tërmeteve që kanë lëkundur vendin tonë.

Ndërkohë së fundmi ajo ka ardhur me një rrëfim ndryshe në programin “Rudina”.

Edhe pse në shumë botime librash ajo e ka shprehur eksperiencën e saj si inxhiniere, tashmë Bozo do të shpaloësë jetën e saj dhe dashurinë me njeriun e zemrës në një botim të titulluar “Një jetë me ty, të pandarë”.

Ky libër i dedikohet atij, bashkëshortit të saj Todi Bozo, me të cilin jetoi për 55 vite, por e humbi  para 3 vitesh.

Në libër ajo shkruan për njohjen e saj me Todin, krijimin e familjes, lindjen e rritjen e fëmijëve, punën si pedagoge, kërkuese dhe studiuese, marrja e titujve shkencorë, botimi i librave universitarë, punët studimore dhe shumë të tjera.

Me pak fjalë ajo ka lënë një “testament” për të gjithë pasardhëesit e saj biologjikë dhe jo vetëm, kontributi i saj si inxhiniere dhe dijet që ajo ka ofruar për shumë breza me radhë do të mbeten referenca dhe për shumë të tjerë që do të pasojnë.

Ndërsa është ftuar në një komunikim online nga Rudina Magjistari, Bozo ka folur pak për librin, ndërsa ka treguar se si është njohur me bashkëshortin e saj dhe si është shtuar dashuria e tyre ndër vite.

“Si nuk e mbaj mend, e mbaj mend që ç’ke me atë. Ka qenë një njohje komplet e rastësishme dhe në vitin 1963 në Mars në një darkë familjare tek miqtë tanë, atje e kam parë për herë të parë Todin dhe pastaj ishte një shkëndijë e brendshme, nuk mund ta shpjegoj sesi është që lindi që në atë moment dhe pastaj u rrit, u rrit, u forcua derisa ne pas 6 muajsh që ishim njohur u martuam dhe vazhduam gjithë jetën tonë të duhemi, të kujdesemi, të japim dhe të marrim për njëri-tjetrin. Unë në përgjithësi nuk besoj në fat se them që fatin e bën vetë njeri me punën e tij, por në punën e martesës besoj shumë në fat dhe ndoshta ka qenë fati, nuk di ç’të them. Ka qenë një njohje e rastësishme dhe pas kësaj njohje filloi dashuria e cila u forcua dhe nuk rreshti kurrë së dhëni atë energjinë dhe lëngun magjik që e mban të gjallë një lidhje kaq të gjatë,” tha Luljeta Bozo.