I mori jetën teknikut të kondicionerëve në Tiranë, ja sa vite burg kërkon prokuroria për Griseldo Kusin

Ditën e sotme Prokuroria e Tiranës ka kërkuar 21 vite burg për Griseldo Kusin.

Ky i fundit i ka marrë jetën teknikut të kondicionerit, Indrit Celaj, ngjarje kjo e ndodhur në gusht 2019 në kryeqytet.

Ndërkohë Prokuroria ka kërkuar 18 vite për akuzën e “vrasjes me dashje” dhe 4 vite për “armëmbajtje pa leje”, në total janë 21 vite.

Gjithashtu do të aplikohet gjykim i shkurtuar.

Kujtojmë se Prokuroria e Tiranës mbylli hetimet që në korrik të vitit të kaluar dhe dërgoi në gjykatë Griseldo Kusin.

Griseldo Kusi mbahet i arrestuar nën akuzën për vrasje me dashje, armëmbajtje pa leje dhe veprimeve që pengojnë zbulimin e të vërtetës.

Ndërkohë në dosjen në fjalë do të gjykohet edhe vëllai i Griseldos, Albano Kusi, i cili akuzohet për veprime që pengojnë zbulimin e të vërtetës.

Bujar Kusi, akuzohet për të njëjtën vepër penale, ndërsa Ferdinant Bakalli akuzohet për mos kallëzim krimi dhe veprime që pengojnë zbulimin e të vërtetës. Në dosje do të gjykohet edhe Luan Caka dhe Ali Sula, për moskallëzim krimi.

Prokuroria e Tiranës tha se Griseldo Kusi e ka vrarë Indrit Çelajn pas një debati të shkaktuar për çarjen e një tubi kondicioneri, ku çela e kishte montuar.

Sipas prokurorisë, i akuzuari deklaroi se ata u goditën me mjete pas sherrit.

“Viktima mori trapanin t’më qëllonte dhe unë nxora pistoletën për ta trembur dhe arma shkrepi  pa dashje”, tha ai.

Por në fund të hetimeve  prokurori tha se vrasja është kryer me dashje pasi sipas dëshmitarëve Griseldo Kusi nxori pistoletën dhe pasi ia vendosi atij në kokë e shkrepi.

“Viktima nuk ka goditur me grusht  dhe debati nisi për kondicionerin” ka thënë prokurori i çështjes Julian  Zonja.