“Pse qytetarët rrogëtarë paguajnë 15% më shumë taksa se ata që marrin divident?” Kjo ishte pyetja e Akil Krajës, ekspert për ekonominë në PD, ndaj zëvendësministres së Financave dhe Ekonomisë, Vasilika Vjero, që u shoqërua me debat në A2 Business Week, ku u diskutua mbi taksën e progresive dhe atë të sheshtë.
“Automatikisht, ata kanë mundur që të akumulojnë 26 mijë lekë, si rezultat i ndryshimit të tatimit”, reagoi Vjero. Megjithatë, Kraja kërkoi një arsye se pse ekziston kjo diferencë. “Tatimi mbi fitimin është në masën 15%, ndërsa nëse shpërndahet dividenti i vitit 2018 dhe në vijim, ai është në masën 8%. Kjo është një filozofi drejtimi dhe sigurisht që ka ndërhyrje që janë bërë vitet e fundit. Me ndryshimin që ju bë përqindjes së dividentit ju dha mundësia shumë kompanive të mëdha që kishin shqetësimin se norma e dividentit ishte 15%”, tha Vjero.
Ndërkohë, Kraja reagoi duke theksuar se qeveria duhet të kishte dëgjuar qytetarët për taksën, pasi ata po largohen masivisht pasi nuk i dalin të ardhurat, tha ai.
“Një qeveri e majtë pranon publikisht që keni dëgjuar kompanitë që taksat ishin të larta, por pse nuk dëgjuat qytetarët që taksa është e lartë. Pse të mos dëgjohet një pagamarrës, një profesionist, një mjek, i cili po largohet masivisht nga Shqipëria sepse atij nuk i dalin të ardhurat. Taksa progresive ka rritur pabarazinë”, tha Kraja./ A2CNN
