Balluku: Do jemi në krah të çdo sipërmarrësi që krijon vende të reja pune

Në Kombinat ka marrë jetë një sipërmarrje fason,  sipërmarrje e cila produktet e saj i tregton në tregun italian. Vendet e reja të punës, rreth 100 të tila janë hapur kryesisht për banorët e njësisë numër 6, duke ndikuar në ekonominë e zonës.

Drejtuesja politike e Partisë Socialiste në këtë njësi, Belinda Balluku, vizitoi sipërmarrjen, teksa edhe bisedoi me punonjësit dhe u njoh më nga afër nga sipërmarrësit me iniciativën e tyre. Balluku i garantoi ata për mbështetjen e plotë.

Balluku vlerësoi nismën e dy investitorëve, të cilët po ngrenë këtë ndërmarrje, pavarësisht situatës ku ndodhet vendi. Ajo u ndal edhe tek vendimi i Qeverisë Shqiptare për rritjen e pagës minimale.

“Rritja e pagës minimale ka sjellë një stabilitet të punonjësve. Punonjësit nuk largohen më siç zakonisht ndodhte duke krijuar një kosto. Kontratat janë shumë të rëndësishme dhe mbahen vetëm prej cilësisë së garantuar dhe për të dorëzuar gjithçka në kohën e duhur”, tha Balluku.

Duke garantuar mbështetjet e Qeverisë për investitorët, Balluku theksoi: “Do të jemi në krah të çdo investitori, i cili krijon vende të reja pune. Hapja e bizneseve të reja, apo zgjerimi i atyre ekzistuese ndikojnë drejtpërdrejt në ekonominë jo vetëm të zonës ku ato ushtrojnë aktivitetin, por edhe në ekonominë kombëtare”.

Punonjëset u shprehën të kënaqura sa i takon kushteve në të cilat ato punojnë.