Akuzohet se porositi atentatin në Kamëz/ Me maskë te zezë, del në gjyq ‘i forti’ i Myslym Shyrit

Gjergj Cukali ka dalë sot para gjykatës për tu njohur me masën e sigurisë.

Ai akuzohet se ka “punësuar” dy vëllezërit Edmond dhe Enver Jakimi për të vënë eksploziv poshtë automjetit të biznesmenit Gjon Mena.

Mbi 42-vjeçarin rëndojnë veprat penale “tentativë vrasjeje kryer në bashkëpunim”, “mbajtje eksplozivi”, “sigurim mjetesh për kryerje vrasjeje kundrejt pagesës”, dhe prokuroria ka kërkuar masën “Arrest me burg”.

Cukali është prezantuar para trupit gjykues si një person me precedent penalë para trupit gjykues teksa mbante veshur një maskë të zezë, xhup me ngjyrë blu të errët e kapuç.

“Gjergj Cukali, lindur në Tiranë, banues në Tiranë. Jam dënuar njëherë më parë,”- ka thënë 42-vjeçari i njohur dhe si i “forti i Myslym Shyrit”.

Vetë 42-vjeçari ka mohuar që të ketë lidhje me ngjarjen e ndodhur në Kamëz, paraditen e 11 shkurtit dhe është shprehur se nuk e ka parë kurrë në jetën e tij Gjon Menën, shënjestrën e atentatit.