Akuzat e forta/ Meta i përgjigjet Nanos: Edhe të merresh me kumar, dhe të citosh Biblën nuk shkon

Presidenti Ilir Meta nuk pranoi të komentonte dy ditë më parë akuzat e ish-kryeministrit Fatos Nano në drejtim të tij.

Por duket se së fundmi Kreu i Shtetit ka ndërruar mendje, duke folur nga Korça në lidhje me këto deklarata.

I pyetur nga gazetarët për “7 mëkatet e Biblës” që Nano tha, Meta kishte këtë koment:

“Zero komente për zero zero. Edhe të merresh me kumar edhe të citosh biblën nuk shkon kjo gjë”, tha Kreu i Shtetit.

Pak ditë më parë Fatos Nano tha se Ilir Meta ka patur gjithmonë një plan B në politikë, ndërsa i pyetur në emisionin “Opinion”, se si e shihte rolin e tij si President i vendit, e cilësoi atë si politikanin tek i cili sheh pjesën më të madhe të 7 mëkateve të Biblës.

“Meta ka pasur gjithmonë planin B në mendje. Ka qenë inaktiv, sikur nuk ekzistone në qeverinë e 2002-2005. Iku në 2003, nuk merrte pjesë në diskutime, ka folur vetëm njëherë kur blemë ambasadën tonë në Athinë.nuk ka politikan tek i cili unë shoh pjesën më të madhe të mëkateve, të 7 mëkateve kapitale, është Presidenti i sotëm”, tha Fatos Nano.