U qëllua me breshëri arme teksa udhëtonte me mjet, kush është futbollisti që iu bë atentat

Faxweb.al mëson detaje të reja nga atentati që ka ndodhur në orët e vona të mbrëmjes së djeshme në Lezhë, ku u qëllua me breshëri arme në drejtim të një 25-vjeçari të identifikuar si Eduart Pica.

Burime bëjnë me dije se autorët që kanë qëlluar në drejtim të mjetit ku udhëtonte Pica janë larguar me shpejtësi nga vendngjatja me një mjet që ende nuk është identifikuar nga ana e Policisë, por që janë duke u kqyrur pamjet e sigurisë për të bërë të mundur zbulimin e mundshëm të targave.

Ngjarja ndodhi rreth mesnatës dhe fatmirësisht nuk raportohet për të lënduar, edhe pse numri i plumbave që janë qëlluar në drejtim të makinës ka qenë i madh.

Automjeti në drejtim të cilit u qëllua ishte me targë AA262UR, ku shofer ka qenë 25 vjeçari Eduart Pica, banues në lagjen “Nënë Tereza”, Lezhë. Eduart Pica 3 vite më parë ka qenë i ndaluar për një aksident të ndodhur në Fushë Krujë ku si pasojë kanë humbur jetën 2 persona.

Eduart Pica ka qenë futbollist i moshave të Besëlidhjes pa mundur dot që më pas të kalojë në ekipin e parë të qytetit të Lezhës. Më pas ka bërë aksidentin në fjalë dhe është burgosur për disa kohë, kjo e ka larguar përfundimisht nga futbolli.

Nuk ka detaje se me çfarë merrej tashmë i riu, dhe nëse ngjarja ka lidhje me të shkuarën e tij, apo me ndonjë konflikt të kohëve të fundit që mund të jetë pasur i riu./Faxweb