Nuk humb kohë qeveria greke/ Rama për drekë me Mitsotakis, dërgohet në parlament projektligji për zgjerimin në detin Jon

Ditën e sotme kryeministri Edi Rama është nisur nga Turqia drejt Greqisë, për tu takuar me homologun Kyriakos Mitsotakis dhe ministrin e jashtëm Nikos Dendias.

Kreu i qeverisë greke e ka pritur Ramën për vizitë në shtëpi, aty ku dhe kanë drekuar së bashku.

Të pranishëm kanë qenë dhe ministri Dendias dhe ish-ambasadorja greke në Shqipëri Eleni Sourani.

Por mësohet se po sot qeveria greke nuk ka humbur kohë, duke dërguar kështu në parlament projektligjin për zgjerimin e ujërave territorialë me 12 milje në detin Jon.

Lajmin e kanë dhënë mediat vendase, ndërsa nuk dihet se përse qeveria greke vendosi të dërgojë sot këtë projekligj në parlament.

“Projekt-ligji që zgjeron Greqinë me shtrirjen në 12 milje detare në Detin Jon, është planifikuar të paraqitet në Komisionin kompetent për Punët e Jashtme dhe Mbrojtjen të martën e ardhshme, 12 dhe 15 Janar dhe do të votohet në 19 janar 2021”, thuhet në artikullin e mediave greke.